هل الزواج بيقتل الحب!!...؟؟؟

بسم الله الرحمن الرحيم

السلام عليكم ورحمه الله وبركاته


ولنبدأ كلامنا بخير كلام وهو كلام الله عز وجل

قال تعالى:

بسم الله الرحمن الرحيم
(ومن آياته أن خلق لكم من أنفسكم أزواجا لتسكنوا اليها ، وجعل بينكم مودة ورحمة ، ان في ذلك لآيات لقوم يتفكرون ) …

سورة الروم / آية 21

صدق الله العظيم

في بداية موضوعى اتوجه بالشكر لمشرفنا العزيز ميدو لانه من اوحى ليا بفكرة هذا الموضوع

فكرت كيف ابدأ موضوعى وكيف ابدأ حديثي معكم
فكرت وفكرت كثيرا
انه فعلا موضوع شائك

يتوجب منا ان نتوقف عنده كثيرا

واسمحولى ان اتكلم باللغه العاميه

لان ظاهره الطلاق المبكر بين الشباب زادت اوى

وكانو واخدين بعض عن حب وغرام وهيام يجي 7 سنين واكتر

وينتهى كل ده بكلمه!!!!!!
مش غريبه بردو

واى حد يشوف كده من بعيد يقول ده الجواز ده نهاية اى حب بلا جواز بلا نيله
طب ماهو عندو حق بردو؟؟!!!!!!!

هنعرف ده كلو!!!

طيب خلونا الاول نقول ان الله عز وجل اما شرع الزواج بين المرأه والرجل كان هدفه السكينه والاستقرار وانشاء وحده واحده
وكانت الشروط واضحه جدا
وشرعها عز وجل
ان يكون زواجهم مبنى علي الموده والرحمه
(الموده والرحمه)
هما اساس اي زواج صالح

ده كلام المولى عز وجل يبقي مش الحب نهاية الحب لا ده المفروض علي كلام المولى عز وجل انه يكون بداية الحب

طيب

نشوف بقي اللى بيحصل اليومين دول بين اتنين بيحبو بعض

اتنين بيحبو بعض يجي 5 سنين حب وهيام وغرام(ده اقل واجب 5 سنين) وايه تشوفوهم يالهوىىىىى اتخلقو البعض ودايبين فيعض
واول ما يتجوزو تسمع صوتهم من اخر الشارع (طبعا مش الكل كده انا بطرح جانب معين من بعض الحالات وهم كتير شويتين في طبعا ناس بسم الله ماشاء الله عليهم)

اللي بيحبو بعض
كالاتى

طول ال5 سنين حب وغرام وهيام وياقلبي وياحبي
وبموووووووت فيكى وانت كل اللى ليا ياحبيبي

كل كلامهم كده

طب مفيش مره يتخانقو

لا بيتخانقو

مبيتخانقوش ازاى
بس نشوف بقي الخناقات

هو بيغير عليها من فلان وهو سي السيد طبعا متلبسيش كذا وكذا وكذا ....الخ
ومتكلميش فلان ......الخ بقي


وهى كل خناقاتها غيره في غيره
انت كلمت دى ليه ........وكلو كده

وكلمتين حلوين انتهى الحوار

يعنى حتى خناقاتهم عن حبهم


طيب الاتنين دول حاولو يفهمو بعض

يعرفو شخصيه بعض

حاولو يتكلمو في اى موضوع ثقافي اى حاجه ان شا الله في قضيه الشرق الاوسط

اى حاجه غير الحب

عشان يفهمو تفكير بعض من واجهه تانيه يقربو لبعض بطريقه تانيه غير الحب بس

اصل الحياه مش حب وبس....ولا انتو ايه رأيكم.......!!!!


خلاص حبو بعض واتجوزو والحياه لذيذه طبعا فالاول اتنين بقي بقالهم قرن من الزمان بيحبو بعض ومتخيلين بقي ايه الحياه هتبقي بمبي
(بيسمعو سعاد حسنى كتير)

فالاول طبعا لسه حب وغرام وهيام

بس بعد كده ياجدعان

الحياه مش كده خالص في مشاكل

في ضغوط بس مين يفهم بقي.......!!!!!

البنت بطبعها رومانسيه ولو قعدت من هنا لبكره تقولها كلام رومانسي اتحداك انها تزهق
والراجل بطبعو عملى وبيحب يفكر بعقلو وبيزهق بردو بسرعه

تيجي بقي جوزها مبقاش زى زمان مبقاش زى الاول ده كان رومانسي وبيحبنى اكتر

اله هو مش بقي بيحبنى ولا ايه....وزهق منى.....؟؟؟؟؟

هو بقي البنت دى خنيييق موت عاوزه طول النهار حب ف حب هو انا فاضيلها دى هايفه اوى صحيح ناقصات عقل ودين!!!!!!!!
(طب ما انت اللى عودتها علي كده يا أخ ولا ناسي ال5 سنين اللى قعدتو تحبو فيها بعض)

نشوف بقي ردود فعل البنات
النوع الاول من البنات

واحده تكتم ياعينى فنفسها ومتقولوش حاجه بس ايه ان كيدهن عظيم
تلاقيها بتديلو الاكل كأنها بتقولو بالسم الهارى الخ بقي من المعامله دى فكلووو

(طب بدل النكد ده يا نكديه ماتتكلمى معاه ف اى حاجه بس لالالالالالا لازم الشراب المقلوب يطلع)

وتبقي حياتهم زفت وبارده
والراجل بقي يبدأ يزهق من البيت ويطلع مع اصحابو
ويزيد البرود والهوه بينهم شيء فشيء
(طيب انت اتجوزت واحده غبيه اسالها انتى مالك ياموكوسه وحاول تحل الموضوع بينكم وتتكلمو لالالالالا ازاى بردو دى بت نكديه والله ما انا قاعدلها)
وطبعا دول حياتهم يا اما تستمر فالبرود ده
يا تنتهى بانهم يزهقو وينفصلو

ينهااااار ينفصلو بعد الحب ده

ايوا بينفصلو للاسف!!!!!!

والنوع التانى من البنات
مبتسكتش تلاقي صوتها قد كده وتزعق وتتخانق وتقول بقي اللى فنفسها كلو

(طيب مدام بتعرفي تتكلمى ياهبله وبتقولى متتكلمى بهدوء وبشويش الرجاله بردو بيجو بكلمتين حلوين لالالالالا لازم الصوت يعلا فاكراه هيسكت ...ده انتى غبيه بجد )

طبعا الراجل رده فعلو انو يزعق هو كمان ويعلي صوتو ومع السلامه علي بيت والدتك
(طيب انت عارف ان اتجوزت مجنونه حاول تفهم كلامها هى غبيه ووصلتو بطريقه غبيه زيها ....مش دى نقاوتك يا اخويا اشرب بقي.....لالا بس ازاى الراجل ميسكتش ابدا)

ودول غالبا نهايتهم بتبقي بردو الانفصال

تخيلو بعد كل الحب ده


طيب اكيد في حاجه غلط

طيب لو قولتلكم انهم مش كانو بيحبو بعض
تصدقونى

اه مكنوش بيحبو بعض

كانو بيحبو جانب واحد بس من بعض

هى محبتش كل جوانب الراجل هى حبت الحنين الرومانسي بس

هو محبهاش كلها
حب البنوته الاموره الرومانسيه اللى بتحبو
بس محبش باقي الجوانب



الكلام ده كلو يوصلنا لنقطه
ان احنا لازم نعرف ايه معنى الحب الحقيقي
الحب الحقيقي: هى امرأه تحب رجل بكل تفاصيله وانفعالاته وقسوته وحنيته وجنونه ورجل يعشق امرأه حالمه متمرده لها انفعالاتها ولها لحظات هدوئها ولحظات من الجنون
وذلك بعد حب الله ورسوله
هو عشق للتفاصيل من جميع الجوانب

طيب الغلط فين وايه الحل .........؟؟؟
يبقي الغلطه فين ان احنا بنبنى غلط وبنضيع حبنا
وما بنى علي باطل فهو باطل


يبقي الحل اننا نبنى صح


اننا نرجع للعقل والصواب
لازم اللى بيحبو يبقو راكزين ومش مجانين لازم يعرفو ان كل حاجه بتيجى فوقتها بتبقي حلوه اوى
ميبالغوش اوى فحبهم لان بعد كده والله هيتعبو لان الحياه كلها مش حب فحب

لازم يبقي بينهم مجالات تانيه للكلام غير الحب بس
عشان حياتهم متكونش بارده ونكد
لازم يبقي في تفاهم وحب وموده

وادينا رجعنا لكلام المولى عز وجل

نتبع شريعه الله عز وجل والقرأن الكريم

لانه لم يترك كبيره وصغيره الا واحصاها

الحل فالعقل والتفاهم وان الطرفين يعرفو بعض كويس

يعشقو تفاصيل بعض كويس

يتفاهمومن كل الجوانب
وليس من جانب واحد فقط


اتمنى ان الموضوع يكون نال اعجابكم
يكون افادكم

ويكون جاوب عالسؤال

هو الحب نهايتة الجواز..........؟؟؟؟؟؟؟؟؟؟

وده موضوع مفتوح للنقاش للجميع وعاوزه الكل يستفيد منو ونستفيد من اراء بعض

ملحوظه(مش كل اللى بيحبو كده بس انا بسلط الضوء علي جزء معين هو كبير شويتين بس انا بركز علي اللى في عندهم مشاكل مش اللى الحياه عندهم حاوه وطبعا مش كل الرجال كده ولا كل النساء كده واتمنى اللى يناقش يناقش علي هذا الاساس)

اشكركم جميعا

مشكووووووووووووووووووووووووووووور يا بريف

نورت التوبيك عقبال ما تقول رأيك

لا طبعا لان في حب بيجي بعد الزواج
شكرا يا جميل علي الروعه دي